ਸਰੀ ਨਿਊਟਨ ਹਲਕੇ ਦੇ ਲੋਕਾਂ ਦੀ ਚਿਰੋਕਣੀ ਤੇ ਵੱਡੀ ਮੰਗ ਪੂਰੀ ਹੋਣ ਲੱਗੀ

ਗੁਰਪ੍ਰੀਤ ਸਿੰਘ ਸਹੋਤਾ । ਸਰੀ । ਚੜ੍ਹਦੀ ਕਲਾ ਬਿਊਰੋ

ਸਰੀ ਦੇ ਨਿਊਟਨ ਹਲਕੇ 'ਚ ਬੱਚਿਆਂ ਲਈ ਸਹੂਲਤਾਂ ਦੀ ਘਾਟ ਇਲਾਕਾ ਵਾਸੀਆਂ ਲਈ ਵੱਡੀ ਚਿੰਤਾ ਦਾ ਵਿਸ਼ਾ ਰਿਹਾ ਹੈ ਅਤੇ ਹਰ ਚੋਣਾਂ ਮੌਕੇ ਇਹ ਮੰਗ ਵੀ ਉੱਭਰਦੀ ਰਹੀ ਹੈ ਕਿ ਇੱਥੇ ਕੁਝ ਅਜਿਹਾ ਬਣਾਇਆ ਜਾਵੇ, ਜਿੱਥੇ ਬੱਚੇ ਅਤੇ ਨੌਜਵਾਨ ਆਪਣਾ ਵਿਹਲਾ ਸਮਾਂ ਸਹੀ ਤਰੀਕੇ ਬਤੀਤ ਕਰ ਸਕਣ।

ਮਿਲੀ ਜਾਣਕਾਰੀ ਮੁਤਾਬਕ ਸਿਟੀ ਆਫ ਸਰੀ ਨਿਊਟਨ ਦੇ ਗੜ੍ਹ ਕਿੰਗ ਜੌਰਜ ਬੁਲੇਵਾਰਡ ਅਤੇ 70 ਐਵੇਨਿਊ ਲਾਗੇ 7.5 ਏਕੜ ਜ਼ਮੀਨ ਖਰੀਦ ਕੇ ਇੱਕ ਅਤਿ ਅਧੁਨਿਕ ਰੈੱਕ ਸੈਂਟਰ ਬਣਾਉਣ ਦੀ ਤਿਆਰੀ ਕਰ ਚੁੱਕੀ ਹੈ। ਬੰਦ ਹੋਏ 'ਰੋਨਾ' ਦੀ ਜਗ੍ਹਾ ਇਹ ਰੈੱਕ ਸੈਂਟਰ ਬਣਾਇਆ ਜਾਵੇਗਾ, ਜਿੱਥੇ ਸਵਿਮਿੰਗ ਪੂਲ ਤੋਂ ਇਲਾਵਾ ਜਿੰਮ ਅਤੇ ਹੋਰ ਬਹੁਤ ਸਾਰੀਆਂ ਸਹੂਲਤਾਂ ਵੀ ਮੌਜੂਦ ਹੋਣਗੀਆਂ। ਪਤਾ ਲੱਗਾ ਹੈ ਕਿ ਕੌਂਸਲਰ ਮਨਦੀਪ ਨਾਗਰਾ ਅਤੇ ਕੌਂਸਲਰ ਡੱਗ ਐਲਫਰਡ ਨੇ ਇਸ ਪ੍ਰੌਜੈਕਟ ਲਈ ਕਾਫੀ ਲਾਬਿੰਗ ਕੀਤੀ ਹੈ।

ਬੇਸ਼ੱਕ ਇਸਤੋਂ ਥੋੜ੍ਹੀ ਦੂਰ ਪੁਰਾਣਾ ਨਿਊਟਨ ਰੈੱਕ ਸੈਂਟਰ ਮੌਜੂਦ ਹੈ ਪਰ ਉਹ ਇਲਾਕੇ ਦੀ ਮੌਜੂਦਾ ਅਬਾਦੀ ਦੇ ਹਿਸਾਬ ਬਹੁਤ ਛੋਟਾ ਪੈ ਰਿਹਾ ਸੀ।

ਇਹ ਵੀ ਪਤਾ ਲੱਗਾ ਹੈ ਕਿ ਨੌਰਥ ਸਰੀ ਰੈੱਕ ਸੈਂਟਰ (ਸਕਾਟ ਰੋਡ ਸਕਾਈ ਟਰੇਨ ਸਟੇਸ਼ਨ ਲਾਗੇ) ਕਬੱਡੀ ਦੇ ਮੈਦਾਨ ਵੀ ਬਣਾਏ ਜਾ ਰਹੇ ਹਨ, ਜਿੱਥੇ ਹੋਰ ਖੇਡਾਂ ਵੀ ਕਰਵਾਈਆਂ ਜਾ ਸਕਣਗੀਆਂ।