ਕੈਲੀਫੋਰਨੀਆ ਵਿਚ ਕੈਦੀ ਹੁਣ ਬਣ ਸਕਣਗੇ 'ਫਾਇਰ ਫਾਈਟਰ'

ਕੈਲੀਫੋਰਨੀਆ 13 ਸਤੰਬਰ (ਹੁਸਨ ਲੜੋਆ ਬੰਗਾ)- ਕੈਲੀਫੋਰਨੀਆ ਦੇ ਗਵਰਨਰ ਗੈਵਿਨ ਨਿਊਸੋਮ ਨੇ ਇਕ ਬਿੱਲ ਉਪਰ ਦਸਤਖ਼ਤ ਕੀਤੇ ਹਨ ਜਿਸ ਨਾਲ ਕੈਦੀਆਂ ਦੇ 'ਫਾਇਰ ਫਾਇਟਰ' ਬਣਨ ਲਈ ਰਾਹ ਪੱਧਰਾ ਹੋ ਗਿਆ ਹੈ।

ਕੈਲੀਫੋਰਨੀਆ ਬਿੱਲ ਏ ਬੀ 2147 ਤਹਿਤ ਕੁਝ ਵਿਸ਼ੇਸ਼ ਵਰਗ ਵਾਲੇ ਕੈਦੀ, ਜੋ ਵੱਖ ਵੱਖ ਜੁਰਮਾਂ ਤਹਿਤ ਸਜ਼ਾ ਭੁਗਤ ਰਹੇ ਹਨ, ਲਈ ਇਹ ਮੌਕਾ ਹੋਵੇਗਾ ਕਿ ਉਹ ਆਪਣੇ ਅਪਰਾਧਕ ਪਿਛੋਕੜ ਵਿਚ ਸੁਧਾਰ ਕਰਨ।

ਆਮ ਤੌਰ 'ਤੇ ਅਪਰਾਧਕ ਪਿਛੋਕੜ ਵਾਲੇ ਵਿਅਕਤੀ ਨੂੰ ਨੌਕਰੀ ਨਹੀਂ ਮਿਲਦੀ। ਨਿਊਸੋਮ ਨੇ ਕਿਹਾ ਕਿ ਮੈ ਚਹੁੰਦਾ ਹਾਂ ਕਿ ਕੈਦੀਆਂ ਨੂੰ ਇਕ ਮੌਕਾ ਦਿੱਤਾ ਜਾਵੇ। ਉਹ ਅੱਗ ਬੁਝਾਊ ਅਧਿਕਾਰੀਆਂ ਦੇ ਸਹਿਯੋਗੀ ਵਜੋਂ ਕੰਮ ਕਰਨਗੇ। ਨਿਊਸੋਮ ਨੇ ਟਵਿਟਰ ਉਪਰ ਕਿਹਾ ਹੈ ਕਿ ਕੈਲੀਫੋਰਨੀਆ ਦਾ ਕੈਦੀਆਂ ਸਬੰਧੀ 'ਫਾਇਰ ਫਾਇਟਰ' ਪ੍ਰੋਗਰਾਮ ਬਹੁਤ ਪੁਰਾਣਾ ਹੈ, ਇਸ ਵਿਚ ਸੁਧਾਰ ਕਰਨ ਦੀ ਲੋੜ ਹੈ। ਉਨਾਂ ਕਿਹਾ ਕਿ ਕੈਦੀ ਜੋ ਮੋਹਰਲੀ ਕਤਾਰ ਵਿਚ ਹੋ ਕੇ ਭਿਆਨਕ ਅੱਗ ਉਪਰ ਕਾਬੂ ਪਾਉਣ 'ਚ ਮੱਦਦ ਕਰਨਗੇ, ਨੂੰ ਬਾਅਦ ਵਿਚ ਪੇਸ਼ਾਵਾਰਨਾ ਫਾਇਰ ਫਾਈਟਰ ਬਣਨ ਦੇ ਅਧਿਕਾਰ ਤੋਂ ਵਾਂਝੇ ਨਹੀਂ ਰੱਖਿਆ ਜਾ ਸਕਦਾ।

ਗੰਭੀਰ ਦੋਸ਼ਾਂ ਵਾਲੇ ਕੈਦੀਆਂ ਨੂੰ ਇਸ ਬਿੱਲ ਤੋਂ ਬਾਹਰ ਰੱਖਿਆ ਗਿਆ ਹੈ। ਇਨਾਂ ਵਿਚ ਕਤਲ , ਅਗਵਾ, ਬਲਾਤਕਾਰ , ਅੱਗਜ਼ਨੀ ਤੇ ਹੋਰ ਗੰਭੀਰ ਦੋਸ਼ਾਂ ਤਹਿਤ ਸਜ਼ਾ ਕੱਟ ਰਹੇ ਕੈਦੀ ਸ਼ਾਮਿਲ ਹਨ।

ਇਥੇ ਵਰਣਨਯੋਗ ਹੈ ਕਿ ਕੈਲੀਫੋਰਨੀਆ ਵਿਚ ਲੱਗੀ ਭਿਆਨਕ ਅੱਗ ਨੂੰ ਕਾਬੂ ਪਾਉਣ ਵਿਚ ਮੁਸ਼ਕਿਲ ਆ ਰਹੀ ਹੈ। ਕੈਦੀਆਂ ਦੀ ਅੱਗ ਉਪਰ ਕਾਬੂ ਪਾਉਣ ਲਈ ਸਹਾਇਤਾ ਲੈਣ ਨਾਲ ਜਿਥੇ ਅੱਗ ਬੁਝਾਊ ਮਹਿਕਮੇ ਨੂੰ ਹੋਰ ਵਰਕਰ ਮਿਲ ਜਾਣਗੇ, ਉਥੇ ਕੈਦੀਆਂ ਲਈ ਆਪਣੇ ਆਪ ਨੂੰ ਸੁਧਾਰਨ ਦਾ ਇਹ ਸੁਨਹਿਰੀ ਮੌਕਾ ਹੋਵੇਗਾ।

ਇਸ ਵਾਰ ਲੱਗੀ ਅੱਗ ਵਿਚ ਹੁਣ ਤੱਕ 28 ਮੌਤਾਂ ਹੋ ਚੁੱਕੀਆਂ ਹਨ ਤੇ ਦਰਜਨ ਤੋਂ ਵਧ ਲੋਕ ਲਾਪਤਾ ਹਨ।