ਐਸ. ਪੀ. ਮੋਹਨ ਲਾਲ 'ਤੇ ਜ਼ੀਰਕਪੁਰ 'ਚ ਮਰੀ ਮੁਟਿਆਰ ਦਾ ਸ਼ੋਸ਼ਣ ਕਰਨ ਦਾ ਦੋਸ਼

<p>ਐਸ.ਪੀ. (ਐਚ) ਮੋਹਨ ਲਾਲ<br></p>

ਚੰਡੀਗੜ੍ਹ- ਜ਼ੀਰਕਪੁਰ 'ਚ ਬਟਾਲਾ ਦੇ ਐਸ.ਪੀ. ਦੇ ਫਲੈਟ 'ਚੋਂ ਡਿੱਗ ਕੇ ਮਰੀ 23 ਸਾਲਾ ਮੁਟਿਆਰ ਦੇ ਮਾਮਲੇ 'ਤੇ ਕਾਰਵਾਈ ਨੂੰ ਲੈ ਕੇ ਪੰਜਾਬ ਪੁਲਿਸ ਦੀ ਕਾਰਗੁਜ਼ਾਰੀ ਪਹਿਲੇ ਦਿਨ ਤੋਂ ਹੀ ਸ਼ੱਕ ਦੇ ਘੇਰੇ ਵਿਚ ਆਈ ਹੋਈ ਹੈ | ਇਸ ਸਬੰਧੀ ਐਸ.ਪੀ. (ਐਚ) ਮੋਹਨ ਲਾਲ 'ਤੇ ਮਰਹੂਮ ਲਵਪ੍ਰੀਤ ਕੌਰ ਉਰਫ਼ ਲਵਲੀਨ ਕੌਰ ਨੂੰ ਪੁਲਿਸ ਵਿਚ ਭਰਤੀ ਕਰਵਾਉਣ ਦਾ ਝਾਂਸਾ ਦੇ ਕੇ ਉਸ ਦਾ ਸ਼ੋਸ਼ਣ ਕਰਨ ਦਾ ਦੋਸ਼ ਲਾਉਂਦਿਆਂ ਚੰਡੀਗੜ੍ਹ ਦੇ ਪੰਜਾਬ ਮਨੁੱਖੀ ਅਧਿਕਾਰ ਸੰਗਠਨ ਨੇ ਜਿੱਥੇ ਪੰਜਾਬ ਦੇ ਮੁੱਖ ਮੰਤਰੀ ਤੋਂ ਉੱਚ ਪੱਧਰੀ ਜਾਂਚ ਕਰਵਾਏ ਜਾਣ ਦੀ ਮੰਗ ਕੀਤੀ ਹੈ, ਉਥੇ ਹੀ ਪੀੜਤ ਪਰਿਵਾਰ ਇਨਸਾਫ਼ ਨਾ ਮਿਲਣ ਦੀ ਸੂਰਤ ਵਿਚ ਹਾਈਕੋਰਟ ਦਾ ਦਰਵਾਜ਼ਾ ਖੜਕਾਉਣ ਦੇ ਰੌਾਅ 'ਚ ਹੈ | ਇਹ ਘਟਨਾ ਇਸੇ ਮਹੀਨੇ ਦੀ 17 ਤਰੀਕ ਦੀ ਹੈ, ਜਦੋਂ ਸਵੇਰੇ ਕਰੀਬ ਸਵਾ 7 ਵਜੇ ਜ਼ੀਰਕਪੁਰ ਵਿਚ ਚੰਡੀਗੜ੍ਹ-ਅੰਬਾਲਾ ਮਾਰਗ 'ਤੇ ਸਥਿਤ ਰਿਸ਼ੀ ਅਪਾਰਟਮੈਂਟ ਦੇ ਫਲੈਟ ਨੰਬਰ ਈ-601 (ਛੇਵੀਂ ਮੰਜ਼ਿਲ) 'ਤੋਂ ਹੇਠਾਂ ਡਿੱਗ ਕੇ ਉਕਤ ਮੁਟਿਆਰ ਦੀ ਮੌਤ ਹੋ ਗਈ ਸੀ | ਮਨੁੱਖੀ ਅਧਿਕਾਰ ਸੰਸਥਾ ਦੇ ਚੇਅਰਮੈਨ (ਸੇਵਾਮੁਕਤ) ਜਸਟਿਸ ਅਜੀਤ ਸਿੰਘ ਬੈਂਸ ਨੇ ਮੁੱਖ ਮੰਤਰੀ ਨੂੰ ਇਕ ਲਿਖਤੀ ਪੱਤਰ ਰਾਹੀਂ ਉੱਚ ਪੱਧਰੀ ਜਾਂਚ ਦੀ ਮੰਗ ਕੀਤੀ ਹੈ |