ਹਾਦਸੇ ਦੀ ਜਾਂਚ ਤੋਂ ਪਹਿਲਾਂ ਨਤੀਜੇ 'ਤੇ ਨਾ ਪਹੁੰਚੋ- ਪੁਤਿਨ

ਮਾਸਕੋ- ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੇ ਮਲੇਸ਼ੀਆਈ ਜਹਾਜ਼ ਹਾਦਸੇ ਦੀ ਜਾਂਚ ਪੜਤਾਲ ਪੂਰੀ ਹੋਣ ਤੱਕ ਸਾਰੇ ਪੱਖਾਂ ਨੂੰ ਜਲਦਬਾਜ਼ੀ 'ਚ ਨਤੀਜੇ 'ਤੇ ਨਾ ਪਹੁੰਚਣ ਤੇ ਰਾਜਨੀਤਿਕ ਬਿਆਨਬਾਜ਼ੀ ਤੋਂ ਬਚਣ ਦੀ ਅਪੀਲ ਕੀਤੀ ਹੈ। ਕ੍ਰੇਮਲਿਨ ਪ੍ਰੈੱਸ ਸੇਵਾ ਵੱਲੋਂ ਜਾਰੀ ਬਿਆਨ 'ਚ ਐਤਵਾਰ ਨੂੰ ਇਹ ਜਾਣਕਾਰੀ ਸਾਹਮਣੇ ਆਈ। ਖ਼ਬਰ ਏਜੰਸੀ ਸਿਨਹੂਆ ਅਨੁਸਾਰ ਬਿਆਨ 'ਚ ਕਿਹਾ ਗਿਆ ਹੈ ਕਿ ਰੂਸ ਨੇ ਇੰਟਰਨੈਸ਼ਨਲ ਸਿਵਲ ਏਵੀਏਸ਼ਨ ਆਰਗੇਨਾਈਜੇਸ਼ਨ ਦੀ ਜਾਂਚ 'ਚ ਮਦਦ ਜਾਰੀ ਰੱਖਣ ਦੀ ਆਪਣੀ ਵਚਨਬੱਧਤਾ ਦਰਸਾਈ ਹੈ। ਜਾਂਚ ਪੂਰੀ ਹੋਣ ਤੱਕ ਜਲਦਬਾਜ਼ੀ 'ਚ ਨਤੀਜੇ 'ਤੇ ਪਹੁੰਚਣ ਤੇ ਰਾਜਨੀਤਿਕ ਬਿਆਨਬਾਜ਼ੀ ਤੋਂ ਬੱਚਣਾ ਮਹੱਤਵਪੂਰਨ ਹੈ। 

ਪੁਤਿਨ ਨੇ ਯੂਕਰੇਨ 'ਚ ਜਾਰੀ ਸੰਕਟ ਦੇ ਮੁੱਦੇ 'ਤੇ ੇਬ੍ਰਿਟਿਸ਼ ਪ੍ਰਧਾਨ ਮੰਤਰੀ ਡੇਵਿਡ ਕੈਮਰੂਨ ਨਾਲ ਐਤਵਾਰ ਦੀ ਰਾਤ ਚਰਚਾ ਕੀਤੀ। ਦੋਵਾਂ ਨੇਤਾਵਾਂ ਨੇ ਸਮੱਸਿਆ ਦੇ ਸ਼ਾਂਤੀਪੂਰਨ ਹੱਲ ਦੀ ਜ਼ਰੂਰਤ 'ਤੇ ਜ਼ੋਰ ਦਿੱਤਾ। ਰੂਸ ਦੇ ਰਾਸ਼ਟਰਪਤੀ ਨੇ ਜਰਮਨੀ ਦੀ ਚਾਂਸਲਰ ਐਂਜਲਾਂ ਮਰਕਲ ਨਾਲ ਵੀ ਫੋਨ 'ਤੇ ਗੱਲਬਾਤ ਕੀਤੀ ਜਿਸ ਦੌਰਾਨ ਦੋਵੇਂ ਨੇਤਾ ਇਸ ਗੱਲ 'ਤੇ ਸਹਿਮਤ ਹੋਏ ਕਿ ਯੂਕਰੇਨ ਸੰਕਟ 'ਚ ਸ਼ਾਮਿਲ ਸਾਰੇ ਪੱਖ ਜਹਾਜ਼ ਹਾਦਸੇ ਦੀ ਜਾਂਚ ਦਾ ਮਾਹੌਲ ਤਿਆਰ ਕਰਨ ਤੇ ਘਟਨਾ ਸਥਾਨ 'ਤੇ ਮੌਜੂਦ ਮਾਹਿਰਾਂ ਦੀ ਸੁਰੱਖਿਆ ਸੁਨਿਸ਼ਚਿਤ ਕਰਨ 'ਚ ਮਦਦ ਕਰਨ।