ਫਿਰੋਜ਼ਪੁਰ- ਗੁਰੂ ਹਰਸਹਾਏ ਤੋਂ ਕਾਂਗਰਸੀ ਵਿਧਾਇਕ ਰਾਣਾ ਗੁਰਮੀਤ ਸਿੰਘ ਸੋਢੀ ਦੇ ਨਿੱਜੀ ਸਕੱਤਰ ਨਸੀਬ ਸਿੰਘ ਨੂੰ ਗੋਲੀ ਲੱਗਣ ਦੇ ਮਾਮਲੇ ਨੂੰ ਪੁਲਸ ਦੀ ਵਿਸ਼ੇਸ਼ ਜਾਂਚ ਟੀਮ (ਐਸ ਆਈ ਟੀ) ਦੀ ਰਿਪੋਰਟ ਵਿੱਚ ਝੂਠਾ ਦੱਸਿਆ ਗਿਆ ਹੈ।

ਐਸ ਆਈ ਟੀ ਵੱਲੋਂ ਸ਼ੁੱਕਰਵਾਰ ਨੂੰ ਰਿਪੋਰਟ ਜਾਰੀ ਕਰਨ ਦੇ ਬਾਅਦ ਆਈ ਜੀ ਨਿਰਮਲ ਸਿੰਘ ਮਿੱਤਲ ਨੇ ਪ੍ਰੈਸ ਕਾਨਫਰੰਸ ਦੌਰਾਨ ਕਿਹਾ ਕਿ ਨਸੀਬ ਸਿੰਘ ਦੇ ਪੱਟ ਵਿੱਚ ਗੋਲੀ ਨਹੀਂ ਲੱਗੀ, ਗਰਮ ਰਾਡ ਨਾਲ ਛੇਕ ਕੀਤੇ ਜਾਣ ਦਾ ਸ਼ੱਕ ਹੈ। ਆਈ ਜੀ ਨੇ ਕਿਹਾ ਕਿ ਮੰਗਲਵਾਰ ਨੂੰ ਮਮਦੋਟ ਦੇ ਚਪਾਤੀ ਪਿੰਡ ਵਿੱਚ ਵਿੱਚ ਅਕਾਲੀ ਦਲ ਤੇ ਕਾਂਗਰਸੀ ਕਾਰਕੁਨਾਂ ਵਿੱਚ ਕੁੱਟਮਾਰ ਹੋਈ ਸੀ, ਪ੍ਰੰਤੂ ਉਥੇ ਗੋਲੀ ਨਹੀਂ ਚੱਲੀ। ਫੋਰੈਂਸਿਕ ਰਿਪੋਰਟ ਵਿੱਚ ਉਸ ਨੂੰ ਗਲਤ ਪਾਇਆ ਗਿਆ ਹੈ, ਕਿਉਂਕਿ ਨਾ ਇਹ ਗੋਲੀ ਪੱਟ ਦੇ ਅੰਦਰ ਹੱਡੀ ਤੱਕ ਪਹੁੰਚੀ ਅਤੇ ਨਾ ਹੱਡੀ ਵਿੱਚ ਕਿਸੇ ਤਰ੍ਹਾਂ ਦੀ ਕੋਈ ਸੱਟ ਲੱਗੀ ਹੈ। ਆਈ ਜੀ ਨੇ ਕਿਹਾ ਕਿ ਸੋਢੀ ਨੇ ਸ਼ਿਕਾਇਤ ਕੀਤੀ ਸੀ ਕਿ ਉਸ ਦੇ ਕੰਨ ‘ਤੇ ਪਿਸਤੌਲ ਤਾਣ ਕੇ ਅਕਾਲੀ ਨੇਤਾ ਵਰਦੇਵ ਸਿੰਘ ਮਾਨ, ਮੋਂਟੀ ਵੋਹਰਾ ਅਤੇ ਕੈਸ਼ ਮਾਨ ਨੇ ਜਾਨੋਂ ਮਾਰਨ ਦੀ ਕੋਸ਼ਿਸ਼ ਕੀਤੀ, ਪ੍ਰੰਤੂ ਇਹ ਮਾਮਲਾ ਵੀ ਝੂਠਾ ਪਾਇਆ ਗਿਆ। ਅਕਾਲੀ ਦਲ ਵੱਲੋਂ ਪਿੰਡ ਚਪਾਤੀ ਦੀ ਜਗੀਰ ਕੌਰ ਵੱਲੋਂ ਰਾਣਾ ਸੋਢੀ ‘ਤੇ ਉਸ ਦਾ ਦੁਪੱਟਾ ਖਿੱਚ ਕੇ ਬੇਇੱਜ਼ਤੀ ਕਰਨ ਦਾ ਕੇਸ ਵੀ ਗਲਤ ਨਿਕਲਿਆ ਹੈ।